Հարգելի գործընկերներ,

«ՀՀ տարածք բժշկական արտադրատեսակների ներմուծման կարգը և բժշկական արտադրատեսակների ներմուծման նպատակով իրականացվող փորձաքննության համար անհրաժեշտ փաստաթղթերի ցանկը սահմանելու մասին»  ՀՀ կառավարության 2023 թվականի թիվ 429-Ն որոշման (այսուհետ՝ Որոշում) մեջ ՀՀ Կառավարության 2024 թվականի հոկտեմբերի 17-ի 1619-Ն որոշմամբ կատարվել են փոփոխություններ, որոնցից առանցքային և հիմնական փոփոխությունները ներկայացվում են ստորև՝

1.    Որոշմամբ հաստատված աղյուսակում ներկայացված ԵԱՏՄ ԱՏԳ ԱԱ ծածկագրերը ներկայացվել են նոր խմբագրությամբ, ինչպես նաև հստակեցվել է հավաստագրման ենթակա բժշկական արտադրատեսակների շրջանակը՝ սահմանափակվելով միայն աղյուսակով սահմանված ԵԱՏՄ ԱՏԳ ԱԱ ծածկագրերով:

2.    Հնարավորություն է ստեղծվել մինչև բեռի սահմանահատումը՝ վերջնական հաշիվ ապրանքագրի հիման վրա, ներկայացնել ներմուծման հայտ և ստանալ ներմուծման հավաստագիր: Այս նպատակով վերանայվել է պահանջվող փաստաթղթերի ցանկը՝ հանվել է բեռնափոխադրմանը վերաբերելի փաստաթղթերի ներկայացման պահանջը (օրինակ՝ հանվել է մաքսային պահեստի կնիքով կնքված և մաքսային ծառայողի համապատասխան նշումներով փոխադրման ավիաբեռնագիրը ներկայացնելու պահանջը):

Հարկ է նշել, որ նախապես հավաստագրման համար հնարավոր է դիմել միայն ներմուծվող բեռի բրուտտո և նետտո քաշերի իմացության պարագայում:

3.      Հավաստագրի տրամադրման համար սահմանված ժամկետը կրճատվել է 1 օրով:

4.      Հստակեցվել է օգտագործված բժշկական արտադրատեսակների ներմուծման գործընթացի վերաբերյալ սահմանված իրավակարգավորումը: Փոփոխությունները (Որոշում, Հավելված 1, մաս 4.1) ուժի մեջ կմտնեն 2025 թվականի հունվարի 18-ից, որից հետո չի թույլատրվի օգտագործված բժշկական արտադրատեսակների ներմուծումը ՀՀ՝ բացառությամբ արտադրողի կամ նրա լիազորված կազմակերպության կողմից վերականգնված (refurbished) արտադրատեսակների:

5.      Հստակեցվել է հայտը, ըստ բժշկական արտադրատեսակների առևտրային անվանումների լրացման պահանջը («Մեկ Պատուհան» համակարգում հայտը պետք է կազմել ըստ առևտրային անվանումների՝ «Ապրանքներ» բաժնի «Բժշկական արտադրատեսակի առևտրային անվանում» դաշտում լրացնելով յուրաքանչյուր ներմուծվող արտադրանքի առևտրային անվանումը):

Հարգանքով՝

«Դեղերի և բժշկական տեխնոլոգիաների փորձագիտական կենտրոն» ՊՈԱԿ