Տպել 

asdsadsadsadsad

Կեղծ դեղերի դեմ պայքարում ջանքերի համախմբումն անհրաժեշտություն է այսօր:

Մայիսի 26–ին, Երևանում մեկնարկած երկօրյա «Եվրասիական տարածաշրջանում կեղծ դեղամիջոցների դեմ պայքարի արդի ասպեկտներ» թեմայով տարածաշրջանային գիտաժողովի շրջանակում, ստորագրվել է կեղծ դեղամիջոցների դեմ պայքարում համագործակցության հուշագիր։

Հուշագիրը ստորագրել են Էմիլ Գաբրիելյանի անվան դեղերի եւ բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը, Ինտերպոլի ներկայացուցիչ Սեսիլիա Ֆանտը, Եվրոպայի, Մերձավոր Արեւելքի եւ Ասիայի դեղերի անվտանգության ինստիտուտի տնօրեն Էշլի Հոուն, Սանոֆի Եվրասիական տարածաշրջանի անվտանգության գծով տարածաշրջանային տնօրեն Յուրի Օրլովը, ինչպես նաև Հայաստանում ներկայացված հայտնի դեղագործական ընկերությունների անվտանգության գծով տնօրեններ։

Թեմայի շրջանակներում տեղական և միջազգային մասնագետներն իրենց ելույթներում անդրադարձան կեղծ դեղերի դեմ պայքարի միջազգային փորձին, Եվրոպայում, Եվրասիական տարածաշրջանում կեղծ դեղերի դեմ պայքարի ներկա վիճակին և հնարավոր զարգացումներին:

Առողջապահության փոխնախարար Սերգեյ Խաչատրյանը ողջույնի իր խոսքում կարևորելով գիտաժողովի թեման, նշեց, որ այն ակտուալ է Հայաստանի համար և կեղծ դեղերի դեմ պայքարը ՀՀ ԱՆ առաջնահերթություններից է։

Փոխնախարարը ներկաներին տեղեկացրեց նաև, որ Ազգային ժողովում է «Դեղերի մասին» նոր օրինագիծը, որով առաջին անգամ հստակ սահմանվում է, թե ինչ է կեղծ դեղը։ Օրենքն ընդունելուց հետո ընդունվելու են նաև շուրջ 50 կարգավորող փաստաթղթեր, որոնք կնպաստեն Հայաստանում կեղծ դեղերի շրջանառության կանխմանը:

2012 թվականի սեպտեմբերին ՀՀ-ն ստորագրել է «Մեդիքրայմ» միջազգային կոնվենցիան ( լրիվ անվանումն է «Բժշկական նշանակության արտադրանքի կեղծման և առողջության համար վտանգ ներկայացնող նմանատիպ հանցագործությունների մասին» Եվրոպայի խորհրդի կոնվենցիա): Փաստաթուղթն ընդգրկված է Ազգային ժողովի քառօրյա նիստի օրակարգում: Ամենայն հավանականությամբ առաջիկայում խորհրդարանն այն կվավերացնի:

 

Առողջապահության համաշխարհային կազմակերպության հայաստանյան գրասենյակի ղեկավար Թաթուլ Հակոբյանը ողջույնի իր խոսքում փաստեց, որ կեղծ դեղերի շրջանառության հարցը մշտապես գտնվում է ԱՀԿ ուշադրության կենտրոնում, եւ կազմակերպությունը մշակում է տարբեր ռազմավարություններ այս խնդրի դեմ պայքարելու համար:

«Մասնագիտական շարունակական մոտեցում եւ հզոր կարգավորիչ մարմին՝ ահա այն բանաձևը, որ ԱՀԿն առաջարկում է երկրներին, այդ թվում նաև Հայաստանին, որտեղ բոլոր հիմքերը կան արդյունավետ գործունեության համար», – ամփոփեց միտքը ԱՀԿ ներկայացուցիչը:

Էմիլ Գաբրիելյանի անվան դեղերի եւ բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը կարևորելով գիտաժողովի նպատակն ու բարձրացվող խնդիրներն ընդգծեց, որ «դաշտում պետք է լինեն դեղեր, որոնք պետությունը գրանցել է, ճանաչում է և երաշխավորում է որակն ու անվտանգությունը»։ Հակոբ Թոփչյանն իր ելույթում ներկայացրեց նաև վիճակագրական տվյալներ Հայաստանում դեղերի գրանցման, կեղծ դեղերի շրջանառությունը կանխելու վերաբերյալ:

«Սանոֆի-Ավենտիս գրուփ» դեղագործական ընկերության Եվրասիական տարածաշրջանի անվտանգության գծով տարածաշրջանային տնօրեն Յուրի Օրլովը ընդգծեց համատեղ ջանքերով ընդհանուր չարիքի դեմ պայքարելու, «կեղծարարների կյանքը բարդացնելու» անհրաժեշտությունը: Նա իր խոսքում նշեց, որ կեղծ դեղերը Ուկրաինայից ու Ռուսաստանից տարածվում են տարածաշրջանի երկրներում, ուստի անհրաժեշտ է ջանքերի համախմբում:

Միջազգային գիտաժողովին մասնակցում էին ՀՀ առողջապահության փոխնախարար Սերգեյ Խաչատրյանը , Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնի ղեկավարությունն ու փորձագետները, միջազգային հանրաճանաչ դեղագործական ընկերությունների և փորձագիտական կառույցների պատասխանատու պաշտոնյաներ, ինչպես նաև ՀՀ իրավապահ մարմինների ներկայացուցիչներ:

Գիտաժողովը կազմակերպել են ՀՀ առողջապահության նախարարությունը, Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնը, «Սանոֆի-Ավենտիս գրուփ» դեղագործական ընկերության ակտիվ աջակցությամբ: