Սույն թվականի մայիսի 7-ին մեկնարկվել է դեղերի կողմնակի ազդեցությունների հաղորդման բջջային հեռախոսի հավելված, որի միջոցով Հայաստանի յուրաքանչուր քաղաքացի հնարավորություն կունենա հաղորդել դեղերի կիրառման արդյունքում դիտված կողմնակի ազդեցությունների մասին:
|
|
|
Առողջապահության նախարարության և մասնավորապես` ՀՀ ԱՆ ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնի գործունեության նպատակն է Հայաստանի Հանրապետությունում անվտանգ, արդյունավետ, որակյալ դեղերի մատչելիության ապահովմանն ուղղված դեղային քաղաքականության իրագործումը: Ի թիվս այլ կարգավորիչ գործառույթների, կենտրոնն իրականացնում է դեղերի անվտանգության մշտադիտարկում՝ դեղազգոնության համակարգի շրջանակներում, հանդիսանալով համանուն միջազգային ծրագրի լիիրավ անդամ:
Դեղազգոնության համակարգում անկյունաքարային գործունեությունը դեղերի կողմնակի ազդեցությունների հավաքագրումն է, տվյալները օգնում են բացահայտել դեղերի անվտանգությանը վերաբերող խնդիրները և ձեռնարկել անհրաժեշտ միջոցառումներ՝ նպաստելով հանրային առողջության պահպանմանը և դեղաբուժության շրջանակներում պացիենտի անվտանգության ապահովմանը:
Կողմնակի ազդեցությունների հաղորդման գործընթացը թվային դաշտ տեղափոխելը համահունչ է ներկա ժամանակաշրջանին՝ հաղորդման մատչելիության բարձրացման շնորհիվ հնարավորություն ստեղծելով ընդլայնել բնակչության և առողջապահական ոլորտի մասնագետների ընդգծվածությունը դեղերի անվտանգության դիտարկմանն ուղղված չափազանց կարևոր աշխատանքներում:
2018 թվականին Առողջապահության համաշխարհային կազմակերպության աջակցությամբ՝ Մեծ Բրիտանիայի դեղերի գործակալության հետ համատեղ իրականացվում է դեղազգոնության համակարգի հզորացման ծրագիր (3S- Smart Safety Surveillance), որի շրջանակներում մշակվել է նաև կողմնակի ազդեցությունների հաղորդման բջջային հեռախոսի հավելված:
Հավելվածն ունի մի շարք առավելություններ.
- անվճար է և հասանելի բոլորի համար,
- հնարավորություն է տալիս հաղորդել կողմնակի ազդեցությունը բջջային հեռախոսի միջոցով,
- հաղորդված կողմնակի ազդեցությունը անմիջապես ներբեռնվում է Դեղերի և բժշկական տեխնոլոգիաների փորձագիտական կենտրոնի տվյալների բանկ,
- օգտատերերը կարող են.
- ստեղծել հետաքրքրող դեղերի ցանկ,
-
տեսնել, թե հետաքրքրող դեղի վերաբերյալ ինչ կողմնակի ազդեցություններ են գրանցվել տվյալների միջազգային բանկում,
-
տեսնել իրենց կողմից հաղորդված բոլոր կողմնակի ազդեցությունները:
Հավելվածն անվճար կարելի ներբեռնել iTunes App Store and Google Play -ից IOS կամ Android համակարգով աշխատող բջջային հեռախոսի միջոցով:
Առկա են կողմնակի ազդեցության հաղորդման այլ եղանակներ նույնպես.
- առցանց՝ լրացնելով հայտագիրը կայքում (www.pharm.am),
- թղթային՝ կայքից բեռնելով և լրացնելով հայտագիրը,
- թեժ գծի միջոցով՝ +374 10 20 05 05, 096 22 05 05